De Koel

Dit artikel is gesjreve (of begós) in 't Venloos. Laes hie wie v'r mit de versjillende saorte Limburgs ómgaon.

De Koel (officieel: Covebo Stadion - De Koel -) is 'n vootbalstadion in Venlo, aan de Kaldekerkerwaeg, det deensdeit es thoesstadion van VVV-Venlo. De club speult heej saer 1972, naodet ze 't ald stadion De Kraal, aeve wiejerop, had verlaote. De Koel dank ziene naam aan de lieëg ligging van 't terrein. 't Stadion wuurt, ouk door supporters van ander clubs, vuuel gepreze um de voetbalsfeer en de alderwetse, karakteristieke oetstraoling, in 't bezónder de trep die de speulers oet de kleidkamer nao 't veld mótte aafloupe. Dees trep stónd centraal in 'n mini-documentair van 't tv-program Holland Sport.

In de jaore zevetig, wie staonplaatse nog gewoeën ware, kós 't stadion 'n groeët aantal luuj bevatte; beej de match taege Ajax in 1977 gaof 't 24.500 supporters. Umdet de eise in 't betaald vootbal strenger woorte - zeker in de Iëredevisie, wao VVV van tied tot tied in speulde - mós me De Koel verbouwe. Nao renovaties in 2003 en 2008 kós De Koel nog maar 8.000 luuj berge. Daorum ouk haet me saer 'n paar jaor planne veur 'n niej stadion; dit zoel dan in Blierik, in 't Kazernekerteer, mótte kómme. Veurluipig hebbe die planne nog gein vaste vörm. Tösse 2013 en 2020 speulde me op kunsgraas. Dees beslissing waas gevalle naodet in 't seizoen 2012/13 de graasmat ermelik debeej loog, maar woort weer truukgereid naodet vuuel ander clubs in Nederland ouk weer nao ech graas waore truukgegaon.

Saer 2005 haet 't stadion officieel nao d'n haofsponsor; iers Seacon, allewiel (2020/21) Covebo. D'n alde naam is aevel in de volksmónd blieve hange.